நீங்கள் தேடியது "பொதுமக்கள் அவதி"

நெல்லை:

நெல்லை மாவட்டத்தில் நேற்று அம்பை, ராதாபுரம், சேரன்மகாதேவி, களக்காடு, மூலைக்கரைப்பட்டி மற்றும் அதன் சுற்றுவட்டார பகுதிகளில் கனமழை கொட்டியது. அம்பை, ராதாபுரம் பகுதிகளில் பிற்பகலில் தொடங்கி இரவு வரை பரவலாக மழை பெய்தது.

ராதாபுரத்தில் அதிகபட்சமாக 19 மில்லிமீட்டரும், அம்பையில் 13 மில்லிமீட்டரும் மழை பதிவாகி உள்ளது.

சேரன்மகாதேவி, முக்கூடல், கோபாலசமுத்திரம், மேலச்செவல், பத்தமடை, வீரவநல்லூர், திருக்குறுங்குடி உள்ளிட்ட இடங்களிலும் சாரல் மலை பெய்த வண்ணம் இருந்தது. இன்று காலை முதலே வானில் கருமேக கூட்டங்கள் திரண்டு இருள் சூழ்ந்து காணப்படுகிறது. குளிர்ச்சியான சூழ்நிலை நிலவி வருகிறது.

மேற்கு தொடர்ச்சி மலையையொட்டி அமைந்துள்ள பாபநாசம், சேர்வலாறு மற்றும் மணிமுத்தாறு அணைகளின் நீர்பிடிப்பு பகுதிகளில் நேற்று பகலில் தொடங்கி இரவு வரையிலும் கனமழை பெய்தது.

பாபநாசத்தில் 23 மில்லிமீட்டரும், சேர்வலாறு மற்றும் மணிமுத்தாறு அணைகள் பகுதிகளில் 19 மில்லிமீட்டரும் மழை பெய்தது.

நம்பியாறு அணை நீர்பிடிப்பு பகுதியில் 17 மில்லிமீட்டரும், கொடுமுடியாறு அணை பகுதியில் 5 மில்லிமீட்டரும் மழை பதிவாகி உள்ளது. பாபநாசம் அகஸ்தியர் அருவியிலும் தண்ணீர் ஆர்ப்பரித்து கொட்டி வருகிறது.

நெல்லை மாநகர பகுதியில் நெல்லை, பாளையங்கோட்டையில் நேற்று பகலில் வானம் மேக மூட்டமாக காட்சியளித்த நிலையில், பிற்பகலில் வானில் கருமேக கூட்டங்கள் திரண்டு கனமழை பெய்தது.

சில இடங்களில் லேசான சாரல் மழை பெய்தது. தாழ்வான இடங்களில் தண்ணீர் தேங்கியது. பாளையங்கோட்டையில் 13.20 மில்லிமீட்டரும், நெல்லையில் 8.20 மில்லிமீட்டரும் மழை பதிவாகியது.

இன்று காலையில் இருந்து மாவட்டம் முழுவதும் மழை பரவலாக பெய்த நிலையில், பள்ளிகளுக்கு விடுமுறை விடுவார்கள் என்று பெற்றோர்கள் எதிர்பார்த்திருந்தனர். ஆனால் மாவட்டத்தில் வழக்கம்போல் பள்ளிகள் இயங்கும் என அறிவிக்கப்பட்டதால் கடும் அவதிக்கு இடையே மாணவ-மாணவிகள் மழையில் நனைந்தபடி பள்ளி, கல்லூரிகளுக்கு சென்றதை பார்க்க முடிந்தது.

தூத்துக்குடி மாவட்டத்தில் திருச்செந்தூர், காயல்பட்டி னம், சாத்தான்குளம், குலசேகரன்பட்டினம் ஆகிய இடங்களில் நேற்று பிற்பகலில் தொடங்கி இன்று அதிகாலை வரையிலும் கனமழை பெய்தது.

திருச்செந்தூர் மற்றும் குலசேகரன்பட்டினத்தில் இன்று காலையிலும் மீண்டும் மழை தொடங்கி பரவலாக பெய்து வருகிறது.

காலை நிலவரப்படி அதிகபட்சமாக திருச்செந்தூரில் 6 சென்டிமீட்டரும், குலசேகரன்பட்டினத்தில் 5 சென்டிமீட்டரும் மழை பதிவாகியிருந்தது. இதனால் தாழ்வான பகுதிகளில் மழை நீர் தேங்கியுள்ளது.

திருச்செந்தூரில் சாக்கடை மற்றும் மழைநீர் கலந்து வடிகாலில் அதிகமான தண்ணீர் கடலுக்கு சென்றது. திருச்செந்தூரில் பெய்த கன மழையால் மக்களின் இயல்பு வாழ்க்கை பாதிக்கப்பட்டுள்ளது.

இன்று காலை மழை பெய்த நிலையில், பள்ளி மாணவ-மாணவிகள் குடை பிடித்தும், சில மாணவிகள் மழையில் நனைந்தும் மிகவும் சிரமப்பட்டு பள்ளிக்கு சென்றனர்.

குலசேகரன்பட்டினம் பகுதியில் விடிய, விடிய மழை பெய்ததால் விவசாயிகள் மகிழ்சி அடைந்தனர். பரமன்குறிச்சி, மெஞ்ஞானபுரம் உட்பட 18 ஊராட்சி மற்றும் பேரூராட்சிக்கு உட்பட்ட 100-க்கும் மேற்பட்ட கிராம பகுதிகளில் நேற்று இரவு 10 மணி முதல் இன்று காலை 9 மணியை கடந்தும் தொடர்ந்து விட்டுவிட்டு மழை பெய்து கொண்டே இருந்தது. இதனால் விவசாயிகளும் பொதுமக்களும் மகிழ்ச்சி அடைந்தனர்.

உடன்குடி, குலசை, பரமன்குறிச்சி பஜார் பகுதியில் மழைநீர் பல இடங்களில் தேங்கி கிடந்ததால் போக்கு வரத்துக்கு இடையூறாக இருந்தது. தென்னை, பனை மர விவசாயிகள் மகிழ்ச்சி அடைந்தனர்.

தென்காசி மாவட்டத்தில் மேற்கு தொடர்ச்சி மலையில் அமைந்துள்ள ராமநதி, கடனாநதி மற்றும் கருப்பாநதி, குண்டாறு அணைகளின் நீர்பிடிப்பு பகுதிகளில் பரவலாக மழை பெய்தது.

ராமநதியில் 12 மில்லி மீட்டர் மழை பதிவாகியது. தென்காசி மற்றும் செங்கோட்டை சுற்று வட்டார பகுதிகளில் பரவலாக பெய்த மழையால் சாலையில் தண்ணீர் தேங்கியது. சில இடங்களில் சாக்கடை நீருடன் மழைநீர் கலந்து சென்றது.

நாகர்கோவில்:

குமரி மாவட்டத்தில் ஜூன், ஜூலை மாதங்களில் கடல் சீற்றமாக காணப்படும். இது தவிர அமாவாசை தினங்களிலும், புயல் சின்னங்கள் ஏற்படும் போதும் கடல் சீற்றம் அதிகமாக இருக்கும்.

வங்கக்கடலில் தென்மேற்கு பகுதியில் உருவான காற்றழுத்த தாழ்வு மண்டலம் காரணமாக கடல் சீற்றம் அதிகமாக இருக்கும் என்று சென்னை வானிலை மையம் எச்சரிக்கை விடுத்திருந்தது. இதையடுத்து குமரி மாவட்ட நிர்வாகம் சார்பில் மீன்வளத்துறை அதிகாரிகள் மீனவ கிராமங்களுக்கு முன்னெச்சரிக்கை அறிவிப்பை வெளியிட்டனர்.

இந்த நிலையில் நேற்று முன்தினம் இரவு கன்னியாகுமரி, சின்னமுட்டம், அழிக்கால், கணபதிபுரம், தேங்காய்பட்டினம், பிள்ளைத்தோப்பு, பகுதிகளில் கடல் சீற்றம் அதிகமாக காணப்பட்டது. ராட்சத அலைகள் எழும்பின. குறிப்பாக அழிக்கால், பிள்ளைதோப்பு பகுதியில் எழும்பிய ராட்சத அலைகள் குடியிருப்பு பகுதியிலும் புகுந்தது. சுமார் 150-க்கு மேற்பட்ட குடியிருப்புகளில் வெள்ளம் புகுந்ததால் நேற்று முன்தினம் இரவு பொதுமக்கள் விடிய, விடிய தூங்காமல் தவித்தனர்.

வெள்ளம் புகுந்த வீடுகளில் உள்ள பொதுமக்களை நிவாரண முகாம்களில் தங்க வைத்தனர். பிள்ளைத்தோப்பு, அழிக்கால் பகுதியில் நிவாரண முகாம்கள் திறக்கப்பட்டு அங்கு அவர்கள் தங்க வைக்கப்பட்டுள்ளனர்.

தற்பொழுது 235 பேர் நிவாரண முகாம்களில் தங்கி உள்ளனர். அவர்களுக்கு தேவையான உணவு பொருட்கள் வழங்கப்பட்டு வருகிறது. வீடுகளை சூழ்ந்த தண்ணீர் நேற்று மாலை முதலே வடிய தொடங்கியது. ஒரு சில பகுதிகளில் வீடுகளை சூழ்ந்த தண்ணீர் வடிந்துள்ளது.

பிள்ளைதோப்பு, அழிக்கால் பகுதியில் ஒரு சில பகுதிகளில் வீடுகளை தண்ணீர் சூழ்ந்துள்ளது. இதையடுத்து அந்த பகுதியில் தேங்கியிருந்த தண்ணீரை அப்புறப்படுத்தும் பணி மேற்கொள்ளப்பட்டு வருகிறது. மோட்டார் மூலமாக தண்ணீரை அகற்றும் பணியில் பேரூராட்சி ஊழியர்கள் ஈடுபட்டுள்ளனர்.

இதுமட்டுமின்றி ஜே.சி.பி. எந்திரம் மூலமாக ரோடுகள் சீரமைப்பு மற்றும் தேங்கி கிடக்கும் தண்ணீரை அப்புறப்படுத்தும் பணி நடைபெற்று வருகிறது. தூய்மை பணியாளர்கள் அங்குள்ள குப்பைகளை அப்புறப்படுத்தும் பணியில் ஈடுபட்டு உள்ளனர். வீடுகளை சூழ்ந்த தண்ணீர் வடிந்தாலும் அழிக்காமல், பிள்ளைத்தோப்பு பகுதியில் வீடுகளுக்குள் மணல் அதிகளவு காணப்படுகிறது.

எனவே பொதுமக்கள் அங்கு செல்ல முடியாத நிலை இருந்து வருகிறது. இதையடுத்து வீடுகளுக்குள் கிடக்கும் மணல் குவியல்களை அப்புறப்படுத்தும் பணியும் தொடங்கியுள்ளது. பிள்ளை தோப்பு பகுதியில் 34 வீடுகளும் அழிக்கால் பகுதியில் 41 வீடுகளிலும் மணல் குவியல்கள் உள்ளன. அந்த மணல் குவியல்களை பேரூராட்சி பணியாளர்கள் அப்புறப்படுத்தும் பணியில் ஈடுபட்டுள்ளனர்.

இன்று காலை முதலே 100-க்கும் மேற்பட்ட பணியாளர்கள் அதை சரி செய்யும் பணியை மேற்கொண்டுள்ளனர். பிள்ளைத்தோப்பு, அழிக்கால் பகுதியில் அதிகாரிகள் முகாமிட்டு பொதுமக்களுக்கு தேவையான அடிப்படை வசதிகளை மேற்கொண்டு வருகிறார்கள். இந்த நிலையில் அழிக்கால் பகுதியில் இன்றும் கடல் சீற்றம் அதிகமாக காணப்பட்டது.

லெமூர் கடற்கரை பகுதியில் கடல் சீற்றம் அதிகமாக உள்ளது. இதனால் இன்று 2-வது நாளாக கடற்கரைக்கு சுற்றுலா பயணிகள் செல்ல தடை விதிக்கப்பட்டுள்ளது. லெமூர் கடற்கரை நுழைவு வாயில் மூடப்பட்டுள்ளது .போலீசார் அங்கு பாதுகாப்பு பணியில் ஈடுபட்டு ள்ளனர். சுற்றுலா பயணிகள் யாரையும் கடற்கரை பகுதிக்கு அனுமதிக்க வில்லை. இதேபோல் கன்னியாகுமரி, குளச்சல், தேங்காய்பட்டினம் பகுதியிலும் கடல் சீற்றமாகவே காணப்பட்டது. கடலுக்கு மீன்பிடிக்க சென்ற மீனவர்கள் எச்சரிக்கையுடன் இருக்குமாறு மீன்வளத்துறை அதிகாரிகள் அறிவுறுத்தியுள்ளனர்.

சத்தியமங்கலம்:

ஈரோடு மாவட்டம் சத்தியமங்கலத்தை அடுத்துள்ள பவானிசாகர் வனச்சரகத்திற்கு உட்பட்ட பகுதியில் தெங்குமரஹாடா மலை கிராமம் உள்ளது. இந்த மலை கிராமத்தை சென்றடைய மாயாற்றை கடக்க வேண்டும்.

மலை கிராமத்தில் வசிக்கும் வியாபாரிகள், பள்ளி மாணவ-மாணவிகள், கல்லூரிக்கு செல்லும் மாணவர்கள் மாயாற்றை பரிசல் மூலம் கடந்து சத்தியமங்கலம் வந்து செல்வது வழக்கம். மழைக்காலங்களில் மாயாற்றில் திடீரென வெள்ளப்பெருக்கு ஏற்பட்டு விடும். அந்த சமயம் ஆபத்தை உணராமல் பரிசலில் மக்கள் சென்று வருகின்றனர்.

இந்நிலையில் தற்போது தமிழகத்தில் பல்வேறு இடங்களில் பரவலாக மழை பெய்து வருகிறது. குறிப்பாக நீலகிரி மற்றும் அதன் சுற்றுவட்டார பகுதியில் கனமழை பெய்து வருகிறது. இதன் காரணமாக மாயாற்றில் கடந்த 2 நாட்களாக நீர்வரத்து அதிகரித்து வருகிறது.

இன்று காலை மாயாற்றில் 10 ஆயிரம் கனஅடி நீர்வரத்தானதால் கடும் வெள்ளப்பெருக்கு ஏற்பட்டு இரு கறைகளையும் தொட்டபடி நீர் ஆர்ப்பரித்து செல்கிறது. இதனால் இன்று மாயாற்றில் பரிசல் இயக்க முடியாத சூழ்நிலை ஏற்பட்டுள்ளது. மேலும் தொடர்ந்து மழை பெய்து வருகிறது. இதனால் பரிசலை முற்றிலும் இயக்க முடியாத சூழ்நிலை ஏற்பட்டுள்ளது. இதனால் இன்று காலை பள்ளி, கல்லூரிக்கும் மாணவர்கள் மற்றும் வியாபாரத்துக்கு செல்லும் மக்கள் கடும் அவதி அடைந்துள்ளனர்.

இதனால் தெங்குமரஹாடா, அல்லி மாயார் பொதுமக்கள் தங்கள் அன்றாட தேவைகளுக்கு வெளியே வர முடியாது நிலை ஏற்பட்டுள்ளது. மாயாற்றில் நீண்ட வருடமாக தொங்கு பாலம் அமைக்க வேண்டும் என அப்பகுதி மக்கள் கோரிக்கை விடுத்து வருகின்றனர். தற்போதும் தொங்கு பாலம் அமைக்க வேண்டும் என மீண்டும் கோரிக்கை விடுத்துள்ளனர்.

மும்பை:

மராட்டிய மாநிலத்தில் வழக்கமாக ஜூன் மாதம் 2-வது வாரத்தில் தென்மேற்கு பருவமழை தொடங்கும். ஆனால் இந்த ஆண்டு ஜூன் மாத தொடக்கத்திலேயே பருவமழை தொடங்கியது. ஆனாலும் மும்பை பெருநகர பகுதிகளை சுற்றியுள்ள மாவட்டங்களில் பெரிய அளவில் மழை பெய்யவில்லை. இதன் காரணமாக மும்பை, தானே பகுதிகளுக்கு குடிநீர் வழங்கும் ஏரிகளின் நீர்மட்டம் தொடர்ந்து சரிந்து வந்தது.

இந்த நிலையில் மும்பையில் நேற்று இரவு முதல் கனமழை பெய்ய தொடங்கியது. இன்று காலை வரை விடிய விடிய தொடர்ந்து கனமழை பெய்தது.

மேலும் தானே, பால்கர், நவிமும்பை, ராய்காட், மட்டுங்கா, அந்தேரி, குர்லா, பாந்த்ரூப், கிங்ஸ் சர்கிள் உள்ளிட்ட பகுதிகளிலும் நேற்று காலை முதல் பலத்த மழை பெய்து வருகிறது.

இன்று அதிகாலை நேரத்தில் இடைவிடாமல் கொட்டி தீர்த்த கனமழையால் மும்பை நகரமே வெள்ளக்காடாக மாறியது. மும்பையில் பல பகுதிகள் வெள்ளத்தில் மிதக்கின்றன. தாழ்வான அனைத்து பகுதிகளிலும் வெள்ளம் தேங்கி காணப்படுகிறது.

வீடுகளில் தண்ணீர் புகுந்துள்ளதால் பொதுமக்கள் வீடுகளை விட்டு வெளியேற முடியாமல் அவதிப்பட்டனர். இதனால் பொதுமக்களின் இயல்பு வாழ்க்கை முடங்கி உள்ளது.

சாலைகளில் குளம் போல தண்ணீர் தேங்கி கிடப்பதால் வாகன ஓட்டிகள் கடும் சிரமத்திற்கு உள்ளாகினர். தண்டவாளங்கள் தண்ணீரில் மூழ்கியுள்ளதால் ரெயில் சேவை கடுமையாக பாதிக்கப்பட்டு உள்ளது.

வெளியூர்களுக்கு செல்லும் விரைவு ரெயில்கள் உள்பட 5 ரெயில் சேவைகள் ரத்து செய்யப்பட்டுள்ளன. மேலும் மின்சார ரெயில் சேவைகளும் முடங்கியுள்ளன. இதனால் பொதுமக்கள் கடும் அவதிக்கு உள்ளானார்கள்.

இன்று காலையில் தண்டவாளத்தில் தேங்கிய வெள்ளம் ஓரளவு வடிந்துள்ளதால் மின்சார ரெயில்கள் தாமதமாக இயக்கப்பட்டன. பாண்டுப், சியோன் பகுதிகளில் வெள்ளம் வடிந்துள்ளதால் அங்கு மீண்டும் ரெயில் சேவை மீண்டும் தொடங்கியுள்ளது.

மேலும் பஸ் போக்குவரத்து சேவையும் முடங்கியுள்ளது. பல பஸ்கள் வாற்று வழிகளில் திருப்பிவிடப்பட்டன. சாலைகளில் வெள்ளம் தேங்கி கிடப்பதால் கடும் போக்குவரத்து நெரிசலும் ஏற்பட்டுள்ளது.

பல சாலைகளில் முழங்கால் அளவுக்கு வெள்ளம் பெருக்கெடுத்து ஓடுவதால் வாகன ஓட்டிகள் தத்தளிக்கிறார்கள்.

மும்பை விமான நிலையத்துக்கு செல்லும் சாலைகளில் தண்ணீர் தேங்கியுள்ளதால் அங்கு போக்குவரத்து நெரிசல் ஏற்பட்டுள்ளது. இதனால் விமான நிலையங்களுக்கு செல்லும் பயணிகள், குறித்த நேரத்துக்கு செல்ல முடியாமல் கடும் சிரமத்தை சந்தித்தனர்.

கனமழை காரணமாக மும்பையில் அத்தியாவசிய தேவைகள் இருந்தால் மட்டுமே பொதுமக்கள் வீடுகளை விட்டு வெளியே வர வேண்டும் மாநகராட்சி அதிகாரிகள் அறிவுறுத்தியுள்ளனர். தேவையில்லாமல் பொதுமக்கள் வீடுகளை விட்டு வெளியே வர வேண்டாம் என்று அவர்கள் கேட்டுக் கொள்ளப்பட்டுள்ளனர்.

பலத்த மழை காரணமாக மும்பையில் பள்ளிகள் மற்றும் கல்லூரிகளுக்கு இன்று விடுமுறை அளிக்கப்பட்டுள்ளது. மேலும் சதாரா, சாங்லி, கோலாபூா் உள்ளிட்ட மாவட்டங்களிலும் கனமழை நீடித்து வருகிறது. தானே மாவட்டத்தில் வெள்ளம் சூழ்ந்த ரிசாா்ட்டில் சிக்கியிருந்த 49 பேரை தேசிய பேரிடா் மீட்புப் படையினா் மீட்டனா்.

தாதர் பகுதியில் சாலைகளில் வெள்ளம் தேங்கியுள்ளதால் வாகன போக்குவரத்து முடங்கியது. மும்பை தானே பகுதியில் நேற்று முன்தினம் முதலே கனமழை பெய்வதால் அங்கு பாதிப்புகள் அதிகமாக உள்ளது.

இடைவிடாத மழையால் மழைநீர் கால்வாய்கள் நிரம்பி வழிவதால் நகரில் ஆங்காங்கே தண்ணீர் சூழ்ந்து போக்குவரத்துக்கு இடையூறு ஏற்பட்டுள்ளது.

இந்த நிலையில் இன்று காலை முதல் மும்பை மற்றும் புறநகர் பகுதிகளில் மீண்டும் பலத்த மழை பெய்து வருகிறது. இன்று அதிகாலை 1 மணி முதல் காலை 7 மணி வரை 6 மணி நேரத்தில் மும்பையில் 30 செ.மீ. மழை பதிவாகியுள்ளது.

இதற்கிடையில் இந்திய வானிலை ஆய்வு மையம் வெளியிட்டுள்ள வானிலை முன்னறிவிப்பில், மும்பையில் தென்மேற்கு பருவமழை தீவிரம் பெற்றுள்ளதால் வரும் 10-ந்தேதி வரை மழை தொடரும். குறிப்பாக மராத்வடா பகுதியில் கனமழைக்கு வாய்ப்புள்ளது என்று தெரிவித்துள்ளது.

இதேபோல் வட மாநிலங்களிலும் பருவமழை தீவிரம் அடைந்துள்ளது. உத்தரபிரதேச மாநிலத்தில் சிராவஸ்தி, குஷிநகா், பல்ராம்பூா் உள்ளிட்ட மாவட்டங்களில் கனமழை நீடித்து வருகிறது. இதன் காரணமாக, கண்டக், சிராவஸ்தி, ரப்தி ஆகிய ஆறுகளில் வெள்ளப்பெருக்கு ஏற்பட்டுள்ளது.

பல கிராமங்களை வெள்ளநீா் சூழ்ந்துள்ள நிலையில், கிராம மக்களை மீட்கும் பணிகளில் தேசிய பேரிடா் மீட்பு படையினா், மாநில பேரிடா் மீட்பு படையினா் ஈடுபட்டுள்ளனா்.

பீகாரில் கனமழை நீடித்து வரும் நிலையில், கடந்த 24 மணிநேரத்தில் மின்னல் தாக்கி 10 போ் உயிரிழந்தனா். இதன் மூலம் கடந்த 2 நாள்களில் மின்னல் தாக்கி உயிரிழந்தோா் எண்ணிக்கை 19 ஆக அதிகரித்துள்ளது. கடந்த 2 வாரங்களில் 40 போ் உயிரிழந்து விட்டனா்.

பீகார் மாநிலத்தில் பாயும் கோசி, மகாநந்தா, பாகமதி, கண்டக், கமலா உள்ளிட்ட ஆறுகளில் அபாய அளவை தாண்டி வெள்ளம் பாய்கிறது.

தாழ்வான பகுதிகளில் வெள்ளநீா் சூழ்ந்துள்ள நிலையில், அங்கு சிக்கியுள்ளவா்களை மீட்கும் பணிகள் மேற்கொள்ளப்பட்டுள்ளது.

அசாம் மாநிலத்தில் கனமழை நீடித்து வரும் நிலையில், 29 மாவட்டங்களில் 24 லட்சத்துக்கும் மேற்பட்டோா் பாதிக்கப்பட்டுள்ளனா். துப்ரி மாவட்டத்தில் அதிகபட்சமாக சுமாா் 8 லட்சம் போ் பாதிக்கப்பட்டுள்ளனா். மழைக்கு பலியானவர்களின் எண்ணிக்கை 78 ஆக அதிகரித்துள்ளது.

பிரம்மபுத்திரா உள்பட முக்கிய ஆறுகளில் அபாய அளவை தாண்டி வெள்ளம் பாய்கிறது. மழை வெள்ளத்தால் சாலைகள், பாலங்கள் ஆகியவை கடுமையாக சேதமடைந்துள்ளன.

காசிரங்கா தேசிய பூங்காவில் வெள்ளத்தில் சிக்கி காண்டாமிருகங்கள் உள்பட 130 வனவிலங்குகள் உயிரிழந்துவிட்டன.

ஊட்டி:

நீலகிரி மாவட்டம் ஊட்டி மற்றும் சுற்றுவட்டார பகுதிகளில் நேற்று காலை முதல் கனமழை வெளுத்து வாங்கியது. இதனால் அங்குள்ள ரோடுகளில் வெள்ளம் பெருக்கெடுத்து ஓடியது.

மேலும் கிரீன்பீல்டு, லோயர்பஜார் ஆகிய பகுதிகளில் உள்ள பெரும்பாலான குடியிருப்புகளில் மழைநீர் புகுந்ததால் பொதுமக்ள் கடும் அவதிக்கு உள்ளாகினர்.

இதுமட்டுமின்றி அங்குள்ள கடைகளிலும் தண்ணீர் புகுந்ததால் பொருட்களை வாங்க வந்த மக்கள் பாதிக்கப்பட்டனர். மழை ஓய்ந்த பிறகு கடைகளில் புகுந்த வெள்ளநீரை வியாபாரிகள் வெளியேற்றினர்.

ஊட்டி பஸ் நிலையம் மற்றும் ரெயில் நிலைய பாலத்தின் அடியில் தாழ்வான பகுதிகளில் வெள்ளம் தேங்கியது.

இதில் அந்த வழியாக சென்ற சுற்றுலா வாகனங்கள் சிக்கிக்கொண்டன. மேலும் படகு இல்ல சாலையில் போக்குவரத்து நெரிசல் ஏற்பட்டு, வாகனங்கள் மாற்றுவழியில் திருப்பிவிடப்பட்டன.

ஊட்டி கமர்ஷியல் சாலையில் தண்ணீர் தேங்கி குளம்போல காட்சி அளித்தது. இருப்பினும் ஊட்டிக்கு வந்திருந்த சுற்றுலா பயணிகள் கனமழையை ரசித்தபடி செல்போனில் வீடியோ பதிவுசெய்து மகிழ்ச்சி அடைந்து வருகின்றனர்.

இதற்கிடையே தேயிலை தோட்டங்களில் நல்ல ஈரப்பதம் தென்படுவதால் அங்குள்ள விவசாயிகள் நிலத்துக்கு உரமிட்டு பராமரிக்க தயாாராகி வருகின்றனர். மேலும் அங்குள்ள காய்கறி தோட்டங்களில் தற்போது விதைப்பு பணிகள் விறுவிறுப்பாக தொடங்கி நடைபெற்று வருகின்றன.

ஊட்டியில் பெய்துவரும் கனமழையால் ஏற்பட்டு உள்ள பாதிப்புகள் குறித்து நகராட்சி கமிஷனர் ஏகராஜ் கூறுகையில், பாதாள சாக்கடை குழாய்கள் ஆங்காங்கே நிரம்பி வழிந்து சாலைகளில் கழிவுநீர் வெளியேறுவதால் குடியிருப்பு பகுதிகளில் இருந்து வரும் தண்ணீரை பாதாள சாக்கடைக்குள் விட வேண்டாம்.

மேலும் ஓட்டல், விடுதிகளின் உரிமையாளர்கள் கட்டிடம் மற்றும் வளாகத்தில் இருந்து வரும் தண்ணீரை பாதாள சாக்கடை குழாய் இணைப்புக்குள் பொருத்தி இருக்கக்கூடாது. அப்படி செய்தால் சம்பந்தப்பட்டவர்கள் மீது பொது சுகாதார சட்டப்படி அபராதம் விதிப்பதுடன் கட்டிடத்தில் உள்ள பாதாள சாக்கடை இணைப்பும் துண்டிக்கப்படும் என எச்சரிக்கை விடுத்து உள்ளார்.

சிறு தொழில் வளர்ச்சி நாட்டுக்கு தேவை. அதுவே வீட்டுக்கு பாதிப்பை ஏற்படுத்தும் சூழ்நிலைகள் உருவாவதை அதிகாரிகள் அனுமதிக்கலாமா? என்று ஒருவருக்கொருவர் ஆதங்கப்பட்டு கொண்டிருந்தார்கள்.

அவர்களுக்கு நடுவில் ஒருவர் அணிந்திருந்த பேன்ட் கால் மூட்டு பகுதியில் கிழிந்தும் சட்டை தோற்பட்டையில் கிழிந்தும் இருந்ததை பார்த்தும் ஏதோ விபத்தில் சிக்கி இருக்கிறார் என்பதை மட்டும் உணர முடிந்தது.

அந்த கூட்டத்தின் அருகில் சென்ற நாரதர் காதை அவர்கள் பக்கம் திருப்பினார். என்னதான் நடக்கிறது? என்பதை அறிந்து கொள்ள காதை கூர்மையாக்கி கொண்டார்.

தொழிற்சாலைகள் பெருகுது! தொழில்கள் வளருகிறது! என்று பெருமைப்படு கிறார்கள். அதற்காக மக்களுக்கு ஏற்படும் சிரமங்களையும் கவனிக்க வேண்டும் அல்லவா?

சென்னையை அடுத்துள்ள தொழில் நகரம். இரை தேடி வரும் பறவைகள் போல் வேலை தேடி தமிழ்நாடு மட்டுமில்லாமல் மற்ற மாநிலங்களில் இருந்தும் ஏராளமானோர் வருகிறார்கள்.

தேடி வந்தவர்களை வாழ வைக்கும் சொர்க்க பூமியாக அம்பத்தூர் தொழில் நகரம் இருக்கிறது என்பதை மறுப்பதற்கில்லை. 5 ஆயிரத்துக்கும் மேற்பட்ட தொழில் நிறுவனங்கள் உள்ளன. இங்கு வேலை செய்பவர்கள், மறைமுக வேலை பெறுபவர்கள் என லட்சக்கணக்கானவர்களின் வாழ்க்கை அம்பத்தூரை நம்பியே இருக்கிறது.

இதனால் குடியிருப்புகளும் பெருகிவிட்டன. அம்பத்தூர் தொழிற்பேட்டையை சுற்றி முதல் பிரதான சாலை, இரண்டாவது பிரதான சாலை, வாவின் சாலை, தொழிற் பேட்டை பிரதான சாலை, முகப்பேர் மேற்கு நெடுஞ்சாலை ஆகிய பிரதான சாலைகள் உள்ளது. பத்துக்கும் மேற்பட்ட தகவல் தொழில்நுட்ப பூங்கா (ஐ.டி.பார்க்) மற்றும் ஐந்தாயிரத்துக்கும் மேற்பட்ட கெமிக்கல் இரும்பு துணி ஏற்றுமதி தொழிற்சாலை என பல்வேறு தொழிற் சாலைகள் நிறைந்து உள்ளன. திருவள்ளூர் கும்மிடிப்பூண்டி பொன்னேரி போன்ற பகுதியில் இருந்து பஸ்கள் மூலம் ஊழியர்கள்அழைத்து வரப்படுகிறார்கள். இரு சக்கர வாகனங்களிலும் ஆயிரக்கணக்கானவர்கள் வருகிறார்கள்.

அது மட்டும் இல்லாமல் வெளிமாநிலங்களான மத்தியபிரதேசம், குஜராத், உத்தர பிரதேசம், ஆந்திரா, கர்நாடகா, ஒடிசா, போன்ற மாநிலங்களில் இருந்து கனரக வாகனங்கள் மூலம் தினமும் தொழிற்சாலைக்கு தேவையான மூலப்பொருட்கள் மற்றும் இரும்பு ராடுகள் ஏற்றுமதி இறக்குமதி ஆகியவை நடைபெறுகின்றன.

இதனால் இந்த கனரக வாகனங்கள் காலை முதல் இரவு வரை மேற்கண்ட சாலைகள் வழியாக சென்று வருவதால் தார் சாலைகள் சேதமடைந்து குண்டும் குழியுமாக உள்ளது இதன் காரணமாக முகப்பேர், நொளம்பூர், ஜெ.ஜெ.நகர், அத்திப்பட்டு, அயப்பாக்கம், ஐ.சி.எப். காலனி, திருமங்கலம் போன்ற பகுதியில் இருந்து சென்னைக்கு பணிக்கு சென்று வரும் பொதுமக்கள் அவதிக்குள்ளாகி உள்ளார்கள். இந்த பகுதியை சுற்றி உள்ள 10-க்கும் மேற்பட்ட தனியார் பள்ளிகள் உள்ளன. தங்களது பிள்ளைகளை பள்ளிக்கு அழைத்துச் செல்லும்போது இந்த குண்டும் குழியுமான சாலைகளால் விபத்துகள் ஏற்படுவதுடன் பெரும் சிரமத்திற்கு ஆளாகின்றனர் கடந்த மாதம் கூட பெண் ஒருவர் தனது தம்பியை அங்குள்ள பள்ளியில் விட்டுவிட்டு திரும்பி வரும்போது லாரி மோதி விழுந்து உயிரிழந்தார் அந்த சம்பவம் நடந்த இரண்டு நாட்களில் இதே போன்று பள்ளிக்கு பெற்றோரடன் சென்ற மாணவன் பள்ளத்தில் கீழே விழுந்து இரண்டு கால்கள் முறிந்து போனது.

எதிர்பாராத விபத்துக்கள் நேரிட்டால் பரவாயில்லை. ஆனால் விபத்துக்களை உருவாக்குவது பராமரிப்பில்லாத சாலைகள்தான். மனித தவறுகளால் அரங்கேறும் இந்த ஆபத்துக்களை தவிர்க்க முடியும். அதற்கு சிட்கோ அதிகாரிகள் மனம் வைக்க வேண்டுமே என்கிறார்கள்.

எத்தனையோ பேர் இந்த சாலைகளால் ஏற்படும் ஆபத்துக்கள் பற்றி முறையிட்டும் "குறை ஒன்றும் இல்லை கண்ணா..." என்பது போல் அதிகாரிகள் பாராமுகமாக சென்று வருகிறார்கள்.

ஒரு பகுதி சாலைகள் அடுத்த வாரத்துக்குள் சீரமைக்கப்படும் என்றும் அம்பத்தூர் 2-வது மெயின் ரோடு, அம்பத்தூர் வடக்கு பகுதியில் உள்ள சாலைகளும் சீரமைக்கப் படும் என்றும் சர்வ சாதாரணமாக அதிகாரிகள் கூறுகிறார்கள்.

ஆனால் உட்புற சாலைகள் நடந்து செல்லக்கூட தகுதியற்ற சாலைகளாகவே உள்ளன. இந்த சாலைகளை அவசர கோலத்தில் சீரமைத்தால் சரி வராது.

கனரக வாகனங்கள் செல்லும் அளவுக்கு சாலைகளை தரமானதாக அமைக்க வேண்டியது அவசியம்.

தொழில் வளர்ச்சியால் மக்கள்.... மக்கள் வளர்ச்சியால் தொழில்கள் வளர்ச்சி.... என்பதை பொறுப்பானவர்கள் உணர்ந்து செயல்பட்டால் யாருக்கும் எந்த பிரச்சினையும் வராது.

சென்னை:

சென்னையின் மிகப்பெரிய வர்த்தக பகுதியான தி.நகர் நெரிசல் மிகுந்த பகுதி. இந்த பகுதியில் மெட்ரோ ரெயில் பணிகளுக்காக போக்குவரத்தில் மாற்றம் செய்யப்பட்டிருந்தது.

இந்த நிலையில் உஸ்மான் ரோட்டில் மேம்பாலம் அமைக்கப்படுவதால் கூடுதலாக மேலும் போக்குவரத்து மாற்றம் செய்யப்பட்டுள்ளது.

இந்த இரண்டு சிக்கல்களால் இடியாப்ப சிக்கலில் சிக்கிய நிலையில் தி.நகர் வாசிகள் திணறுகிறார்கள்.

முறையற்ற இந்த மாற்று திட்டங்களால் பல தெருக்களில் வசிப்பவர்கள் வெளியே வர முடியாமல் திணறுகிறார்கள்.

முக்கியமாக ரங்கன் தெரு, ராமசாமி தெரு, மகாலெட்சுமி தெரு, மோதிலால் தெரு, சரோஜினி தெரு, வெங்கடேசன் தெரு, பிஞ்சலா சுப்பிரமணியன் தெரு, மங்கேஷ் தெரு, ராமநாதன் தெரு, நடேசன் தெரு, தண்டபாணி தெரு ஆகிய தெருக்களில் வசிப்பவர்கள் இதை சமாளிக்க முடியாமல் திணறுகிறார்கள்.

அவசரத்துக்கு எந்த வாகனங்களும் இந்த தெருக்களுக்குள் சென்று விட முடியாது. போக்குவரத்து நெரிசலை கட்டுப்படுத்த முறையான அறிவிப்பு பலகைகளும், போலீசாரும் இல்லை என்பது பெரும் குறை.

தி.நகர் குடியிருப்போர் நலச்சங்க செயலாளர் கண்ணன் கூறும்போது, குடியிருப்பவர்கள் தங்கள் வீடுகளுக்கு எளிதில் செல்ல முடியாத இக்கட்டான நிலையில் இருக்கிறோம். போக்குவரத்து மாற்றத்தை அமல்படுத்துவற்கு முன்பு பொதுமக்களை கலந்து கருத்து கேட்டு இருக்கலாம். இந்த சிக்கலுக்கு ஓரளவு நிவாரணம் பெற ஐகோர்ட்டை நாட முடிவு செய்துள்ளோம் என்றார்.

ஒலிமாசு, வணிக நெருக்கடி, ஆக்கிரமிப்பு உள்பட பல்வேறு நெருக்கடிகளை ஏற்கனவே அனுபவித்து வருவதாகவும் ஆக்கிரமிப்புகளை அகற்றாமல் போலீசார் புதிய போக்குவரத்து மாற்றங்கள் செய்து இருப்பதாக பொதுமக்கள் குற்றம் சாட்டுகிறார்கள். சிலர் வீடுகளை காலி செய்து விட்டு நெருக்கடி இல்லாத இடத்துக்கு சென்று விட யோசிக்கிறார்கள்.

மோதிலால் தெருவை சேர்ந்தவர்கள் கூறும்போது, `உள்ளூர் மக்களுக்கு நடமாடவே கஷ்டமாக உள்ளது. நாங்கள் வளர்ச்சிக்கு எதிரானவர்கள் இல்லை. அதற்காக உள்ளூர் வாசிகள் என்ன விலை கொடுக்க வேண்டும்?

உள்ளூர் வாசிகள் சந்திக்கும் பிரச்சினை பற்றி அவர்களுக்கு எந்த கவலையும் இல்லை. டிசம்பருக்குள் மேம்பால பணியை முடிப்போம் என்கிறார்கள். நம்ப முடியவில்லை என்றனர்.

ரங்கன் தெருவில் இரு பக்கமும் போலீசார் தடுப்பு அமைத்து இருப்பதால் அலுவலகங்களில் இருந்து வீடு திரும்புவதே சிரமமானதாக இருப்பதாக கூறும் இந்த தெருவாசிகளை பக்கத்தில் உள்ள ராமேஸ்வரம் பாதை வழியாக செல்லலாம் என்றால் அந்த பகுதி முழுவதும் வாகனங்கள் நிறுத்தி வைக்கப்பட்டி ருப்பதாக கூறுகிறார்கள்.

நாமநாதன் தெருவும், ரங்கன் தெருவும் கனரக வாகனங்களால் நிரம்பி வழிகின்றன. போக்குவரத்து மாற்றுப் பாதையில் செல்வதால் உள்ளூர் வாசிகள் ஆட்டோக்களில் கூட செல்ல முடியவில்லை என்கிறார்கள்.

வடக்கு உஸ்மான் சாலையில் இருந்து தி.நகர் பஸ் நிலையம் செல்லும் வாகனங்கள் உஸ்மான் ரோடு பாலம் வழியாக செல்ல முற்றிலுமாக தடை செய்யப்பட்டுள்ளது.

ஈரோடு:

ஈரோடு மாவட்டத்தில் கடந்த 2 வாரத்திற்கு மேலாக வெயிலின் தாக்கம் தொடர்ந்து அதிகரித்து வருகிறது. குறிப்பாக தொடர்ந்து 100 டிகிரி மேல் வெயிலின் தாக்கம் இருந்து வருகிறது.

நேற்று தமிழகத்தில் அதிகபட்சமாக ஈரோட்டில் 103 டிகிரி வெயில் பதிவானது. காலை 8 மணிக்கு தொடங்கும் வெயிலின் தாக்கம் மாலை 5 மணி வரை வாட்டி வதைக்கிறது. இதனால் மக்களின் இயல்பு வாழ்க்கை கடுமையாக பாதிக்கப்பட்டுள்ளது. நண்பகல் 12 மணி முதல் 3 மணி வரை வெயிலின் தாக்கம் உச்சத்தில் இருப்பதால் இந்த நேரத்தில் குழந்தைகள், முதியவர்கள், கர்ப்பிணிகள் வெளியே வர வேண்டாம் என மருத்துவர்கள் தெரிவித்துள்ளனர். மதிய நேரம் பொதுமக்கள் வெளியே வருவதை தவிர்த்து வருகின்றனர்.

இதனால் ஈரோடு மாநகர் பகுதியில் எப்போதும் பரபரப்பாக காணப்படும் பன்னீர்செல்வம் பார்க், மணிக்கூண்டு பகுதி, ஈஸ்வரன் கோவில் வீதி, மேட்டூர் ரோடு, பெருந்துறை ரோடு போன்றவை மக்கள் நடமாட்டம் இன்றி வெறிச்சோடி காணப்படுகிறது. வெப்ப காற்றுடன் வெயில் கொளுத்துவதால் வாகன ஓட்டிகள் திணறி வருகின்றனர். இரவு நேரங்களில் வீடுகளில் மின்விசிறி இயங்கினாலும் வெப்பம் காரணமாக புழுக்கம் ஏற்பட்டு அவதி அடைந்து வருகின்றனர்.

வெயிலின் தாக்கத்தில் இருந்து தப்பிக்க இளநீர், மோர் ஆகியவற்றை அதிக அளவில் பருகி வருகின்றனர். இதனால் இது தொடர்பான வியாபாரம் சூடு பிடிக்க தொடங்கியுள்ளது. இதேபோல் தர்பூசணி பழ வியாபாரமும் விறுவிறுப்பாக நடந்து வருகிறது.

வெயில் நேரம் தொடங்கி விட்டதால் மக்கள் பருத்தி ஆடைகளை அணிய வேண்டும். உடலில் நீர் சத்து குறையாத வகையில் தினமும் 4 லிட்டர் வரை நீர் அருந்த வேண்டும். குளிர்பானங்கள், துரித உணவுகளை தவிர்த்து நீர் மோர் மற்றும் நீர் சத்துள்ள காய்கறிகளை உணவில் அதிகளவில் சேர்த்து கொள்ள வேண்டும் என மருத்துவர்கள் அறிவுறுத்தியுள்ளனர்.

தற்போதைய வெயிலின் தாக்கம் அதிகமாக இருக்கும் நிலையில் இன்னும் மே மாதத்தில் என்ன செய்யப் போகிறோம் என ஈரோடு மக்கள் புலம்பி வருகின்றனர்.

வேளச்சேரி:

சோழிங்கநல்லூர் சட்டமன்ற தொகுதிக்கு உட்பட்ட பெரும்பாக்கம் பகுதி வேகமாக வளர்ச்சி அடைந்து வருகிறது.

பெரும்பாக்கம் மற்றும் அதனை சுற்றியுள்ள பகுதிகளில் பல்வேறு ஐ.டி நிறுவனங்கள் மற்றும் தனியார் நிறுவனங்கள் செயல்பட்டு வருகின்றன. இதனால் அப்பகுதியில் தற்போது அதிக அளவில் குடியிருப்புகள் பெருகி மக்கள் தொகை அதிகரித்து உள்ளது. இதே போல் வாகன போக்குவரத்தும் பல மடங்கு உயர்ந்து விட்டது. இந்த நிலையில் பெரும் பாக்கம் ஊராட்சியின் பின் பகுதியில் ஜல்லடியான் பேட்டை பிரதான சாலையில் உள்ள காலி இடம் குப்பைகளை சேகரிக்கும் இடமாக மாற்றப்பட்டு உள்ளது. இங்கு சேகரிக்கப் படும் குப்பைகள் பின்னர் அங்கிருந்து வாகனங்கள் மூலம் ஓரகடம் அருகே உள்ள குப்பை கிடங்கிற்கு கொண்டு செல்லப்பட்டு வருகின்றன. சுற்றிலும் குடியிருப்புகள் உள்ள நிலையில் குப்பை சேகரிக்கும் இடம் தற்போது குப்பை கிடங்காக மாறி விட்டது. இங்கு கொட்டப்படும் குப்பை கழிவுகள் உடனுக்குடன் அகற்றப்படாமல் அங்கேயே குவிந்து கிடப்பதால் தெருநாய்கள் மற்றும் மாடுகள் அந்த பகுதியில் அதிக அளவில் சுற்றி வருகின்றன.

நாய்கள் கழிவுகளை இழுத்து சாலையோரம் போட்டு செல்வதால் வாகன ஓட்டிகள் மற்றும் அப்பகுதி மக்கள் கடும் அவதி அடைந்து வருகிறார்கள். கடும் துர்நாற்றமும் வீசி வருவதாக அப்பகுதி மக்கள் குற்றம் சாட்டி உள்ளனர்.

இங்கு கொட்டப்படும் குப்பைகளை உடனுக்குடன் அகற்றி கிடங்கிற்கு மாற்ற ஊராட்சி நிர்வாகம் கடும் சிரமம் அடைந்து வருகிறது. இதனால் அப்பகுதி குப்பை மேடாக மாறி உள்ளது. இதனை தடுக்க சம்பந்தப்பட்ட அதிகாரிகள் நடவடிக்கை எடுக்க வேண்டும் என்று கோரிக்கை எழுந்து உள்ளது. இதுகுறித்து பொதுமக்கள் கூறும்போது, முறையாக பராமரிக்கப்படாத குப்பை கொட்டும் நிலையத்துக்குள் தெருநாய்கள், கால்நடைகள் அதிக அளவில் சுற்றி வருவதால் பெரும்பாக்கத்தில் இருந்து பள்ளிக்கரணை செல்லும் வாகன ஓட்டிகள் சிரமப்படுகின்றனர். பெரும்பாலான நாட்களில், சேகரிக்கப்படும் குப்பை கழிவுகளில் பாதி மட்டுமே குப்பை கிடங்கிற்கு மாற்றப்படுகிறது. எனவே இந்த பகுதியில் உள்ள குப்பை சேகரிப்பு மையத்தை வேறு இடத்திற்கு மாற்ற வேண்டும் என்றனர்.

ஊட்டி:

நீலகிரி மாவட்டத்தில் டிசம்பர் மாதம் முதல் ஜனவரி மாதம் இறுதி வரை பனிப்பொழிவின் தாக்கம் அதிகமாக இருக்கும். அந்த மாதங்களில் நீர்ப்பனிப்பொழிவு அதிகரித்து, பின்னர் உறைபனியின் தாக்கம் உச்சகட்டத்தை எட்டும்.

இதற்கிடையே நீலகிரி மாவட்டத்தில் உறைபனியின் தாக்கம் வரும் சில நாட்களில் அதிகமாக காணப்படும் என வானிலை ஆய்வு மையம் ஏற்கனவே எச்சரிக்கை விடுத்து இருந்தது.

அதன்படி தற்போது ஊட்டியில் உறைபனி மற்றும் நீர்பனியின் தாக்கம் அதிகமாக காணப்படுகிறது.

இன்று ஊட்டி மற்றும் சுற்றுவட்டார பகுதிகளில் கடும் உறைபனி கொட்டி தீர்த்தது. இதனால் தாவரவியல் பூங்காவில் பிரதானமாக அமைந்து உள்ள புல்தரைகள் மற்றும் ஊட்டி குதிரை பந்தய மைதானம் ஆகிய பகுதிகளில் இருக்கும் புல்தரைகளில் உறைபனி படர்ந்து காணப்பட்டது. அந்த பகுதி முழுவதும் தற்போது வெள்ளை கம்பளி போர்த்தியது போல வெண்மையாக காட்சி அளிக்கிறது.

மேலும் சாலையோரம் நிற்கும் கார், மோட்டார் சைக்கிள் உள்பட பல்வேறு வாகனங்களின் இருக்கைகளில் உறைபனி படர்ந்து காணப்பட்டது.

ஊட்டியில் தற்போது வழக்கத்தை விட கடுங்குளிரின் தாக்கம் அதிகரித்து காணப்படுவதால் அங்குள்ள பொதுமக்களின் இயல்பு வாழ்க்கை வெகுவாக பாதிக்கப்பட்டு உள்ளது.

மேலும் ஊட்டி தாவரவியல் பூங்காவில் நேற்று 4.5 டிகிரி செல்சியஸ் வெப்பநிலை பதிவாகி இருந்தது. இந்த நிலையில் அங்கு இன்று காலை குறைந்தபட்ச அளவாக 2.8 டிகிரி செல்சியஸ் வெப்பநிலை பதிவாகி உள்ளது.

நீலகிரி மாவட்டத்தில் உறைபனியுடன் தற்போது கடுங்குளிரும் நிலவி வருவதால், அங்கு வசிக்கும் பொதுமக்கள் மிகவும் அவதி அடைந்து உள்ளனர். இதனால் அவர்கள் வீட்டின் முன்புறம் நெருப்பு மூட்டி குளிர்காய்ந்து வருகின்றனர்.

பொங்கல் தொடர்விடுமுறையை முன்னிட்டு நீலகிரி மாவட்டத்துக்கு சுற்றுலா வந்திருந்த பயணிகள், அதிகாலையில் நிலவும் கடுங்குளிரால், வெளியில் சென்று பார்க்க முடியாமல் விடுதிகளுக்குள் முடங்கி உள்ளனர். நீலகிரியில் உறைபனி கொட்டி தீர்த்து வருவதால் ஊட்டிக்கு வரும் சுற்றுலாப்பயணிகளின் எண்ணிக்கை தற்போது குறைந்து உள்ளது.

அருவங்காடு:

நீலகிரி மாவட்டத்தில் ஆண்டுதோறும் வடகிழக்கு பருவமழை நவம்பர் மாதம் தொடங்கி ஜனவரி தொடக்கம் வரை வெளுத்து வாங்குவது வழக்கம். அதன்படி அங்கு தற்போது கனமழை பெய்து வருகிறது.

குன்னூர்-மேட்டுப்பாளையம் மலைப்பாதையில் பருவமழை காரணமாக இதுவரை 13 இடங்களில் மண்சரிவு ஏற்பட்டு உள்ளது. மேலும் 23 இடங்களில் மரங்கள் முறிந்து விழுந்து உள்ளன.

இதுதவிர மலைப்பாதையின் பல்வேறு பகுதிகளில் பாறைகள் சரிந்து விழுந்து போக்குவரத்து பாதிப்பு ஏற்பட்டு வருகிறது. எனவே தீயணைப்பு மற்றும் பேரிடர் மீட்புக்குழுவினர் சம்பவ இடங்களில் சீரமைப்பு பணிகளை மேற்கொண்டு வருகின்றனர். எனவே குன்னூர்-மேட்டுப்பாளையம் மலைப்பாதை வழியாக செல்லும் வாகனஓட்டிகள் அச்சத்துடன் பயணிக்க வேண்டிய சூழ்நிலை நிலவுகிறது.

இதற்கிடையே நீலகிரி மாவட்டத்தில் தற்போது பனிப்பொழிவு அதிகரித்து வருகிறது. இதன்காரணமாக மேற்கு தொடர்ச்சி மலைப் பகுதியில் மேக கூட்டங்கள் தரைக்கு மிகவும் அருகே தவழ்ந்து செல்வதை பார்க்க முடிகிறது.

அதிலும் குறிப்பாக குன்னூர் பகுதியில் பகல் நேரங்களில் கூட மேகமூட்டம் அதிகரித்து காணப்படுகிறது. இதனால் எதிரே வரும் வாகனங்கள் தெரியவில்லை. எனவே வாகன ஓட்டிகள் முகப்பு விளக்கை எரியவிட்டபடி வாகனங்களை மெதுவாக இயக்கி வருகின்றனர். இதனால் குன்னூர் மலைப்பாதையில் வாகனங்கள் மெதுவாக ஊர்ந்து செல்வதை பார்க்க முடிகிறது.

குன்னூர் பகுதியில் நேற்று முதல் மழைச்சாரலுடன் மேகமூட்டம் அதிகமாக காணப்படுகிறது. இது அந்த பகுதியில் வசிக்கும் பொதுமக்களின் இயல்பு வாழ்க்கையை முடக்கி உள்ளது.

இதுதொடர்பாக குன்னூர் மலைப்பாதை வழியாக செல்லும் வாகன ஓட்டிகள் கூறியதாவது:-

குன்னூரில் கடந்த 50 ஆண்டுகளுக்கு முன்பு அடர்பனிமூட்டம் ஏற்பட்டது. அதன்பிறகு தற்போதுதான் வரலாறு காணாத அளவில் அதிகப்படியாக பனிமூட்டத்தை பார்க்க முடிகிறது. மேலும் அங்கு காலநிலை மாற்றமும் ஏற்பட்டு உள்ளது.

நீலகிரி மாவட்டத்தில் கனமழை காரணமாக நிலத்தில் ஈரத்தன்மை அதிகரித்து உள்ளது. இந்நிலையில் அங்கு ஒருசில நாட்களில் உறைபனியின் தாக்கம் அதிகரிக்க வாய்ப்பு உள்ளதாக வானிலை மையம் தெரிவித்து உள்ளது. எனவே நாங்கள் அச்சத்துடன் வாகனங்களில் பயணித்து வருகிறோம்.

இவ்வாறு அவர்கள் கூறினர்.

குன்னூரில் இன்று காலை 10 மணியை கடந்த பின்னரும் அடர் பனி மூட்டம் காணப்பட்து. இதனால் அங்கு கடும் குளிர் நிலவுகிறது. பொதுமக்கள் குளிரை தாங்க முடியாமல் அவதிக்குள்ளாகி உள்ளனர். குன்னூருக்கு வந்த சுற்றுலாபயணிகள் வெளியே செல்ல முடியாமல் ஓட்டல்களிலேயே முடங்கிப் போய் உள்ளனர்.

கிருஷ்ணகிரி மாவட்டம் ஊத்தங்கரை அடுத்த படப்பள்ளி ஊரா ட்சிக்குட்ப ட்ட பட்டக்கா னூர், அம்பேத்கர்நகர், புதுக்காடு ஆகிய கிராம த்திற்கு செல்லும் தார் சாலை, ஜல்லி கற்கள் பெயர்ந்து குண்டும் குழியுமாக இருப்பதால், வாகன ஓட்டிகள் மிகுந்த சிரமத்திற்குள்ளாகின்றனர்.

பல ஆண்டுகளாக இந்த சாலை சேதமடைந்து போக்கு வரத்துக்கு இடையூ றான நிலையில் உள்ளது.

இதில் பள்ளி, கல்லூரி வாகனங்கள் மற்றும் விவசாய பொருட்களை ஏற்றிச் செல்லும் வாகனங்கள், அடிக்கடி விபத்தில் சிக்குவது தொடர்கதையாகி வருகிறது.மேலும் வயதானவர்கள் கர்ப்பிணி பெண்கள் மரு த்துவமனைக்கு குறிப்பிட்ட நேரத்தில் செல்வது பெரும் சவாலாக உள்ளது.

சாலையை சீரமைக்கக் கோரி அப்பகுதி கிராம மக்கள் பலமுறை புகார் அளித்தும் எந்தவித நடவடி க்கையும் இல்லை. எனவே சாலையை சீரமைத்து புதிய தார் சாலை அமைக்க, மாவட்ட கலெக்டர் உரிய நடவடிக்கை எடுக்க வேண்டும் என அப்பகுதி பொதுமக்கள் கோரிக்கை விடுத்துள்ளனர்.